Tuichangral Zirlai Pawl in an zirlai ti thate lawmpuina an hmang

by News Editor

Tualchhung News

ZORAM TODAY| 17th July, 2024 (Nilaini): Vawiin khan Tuichangral Zirlai Pawl (TCZP) chuan bial chhung zirlaite tan, 'Freshers' Social leh zirlai ti ṭha lawmpuina' hun I& PR Auditorium, Treasury Square ah an hmang a. He hun hi Hrangturzo bialtu MLA, Adviser to Chief Minister nibawk, Lalmuanpuia Punte chuan khuallian niin a hmanpui.

Lalmuanpuia Punte chuan, Tuichangral mite hmasawn nana a ngaihpawimawh chu zirna leh hriselna anih thu a sawi a, chutiang lam hawi chuan hmalakna a kalpui thu a tarlang. Kristian nundan phung tamtak hmasawnna vanga tihbo tum zawnga hmalak chu thalo a ti hle, tiin TCZP thuchhuah ah tarlan a ni.

Hrangturzo bialtu MLA chuan, nationalism kan ngaih pawimawh a tul hle a, kan chenna hmun a zirin kan hnam a dang mai zawk a, Zofa unau kan nihna ah hian chiang ila, inlungrual tak a chen ho tum a ṭul a ni, a ti bawk.

Lalbiakkila Tlau MPS, SP, Anti Corruption Bureau (ACB) pawhin thu sawiin, mahni nihna anga lan ngam a tul thu a tarlang a. Social media hrang hranga mahni nihna mil lo lutuka kan lang fo chuan kan nun a tichhia niin a sawi a, zirna kawngah mahni tawka hmasawn zawnga taihmakna nen kal a ṭul thu, zirlai kalkhawmte hmaah a sawi.

Zirna leh hnathawhna hrang hrangah taima taka inbuatsaih lawkna tha nei chu Pathianin malsawmna in a vur ngei ang, a ti a, kan thil tihna kawng hrang hrangah inbuatsaih lawkna tha tak nei zel turin zirlaite ka ngen a che u, a ti bawk.

Tuichangral Zirlai Pawl (TCZP) huam chhung ah hian khaw sawm leh pali (14) an awm. HSLC, HSSLC, UG & PG result chhuak tawh ah khaw hrang hrang atanga zirlai ti tha zual distinction-a passed chinte lawmpuina mi 36 hnenah hlan a ni a, Tuichangral huam chhung aṭanga zirna In leh zirlai ti tha berte hnenah lawmpuina an hlan bawk.